မြန်မာ- ထိုင်း နယ်စပ်ဖြတ်ကျော် လူကုန်ကူးမှု များကို ထိရောက်စွာအရေးယူ ပြစ်ဒဏ်ချမှတ်နိုင်ရန် နှစ်နိုင်ငံ ပူးပေါင်းဆွေးနွေးမည်

ထိုင်နိုင်ငံ နယ်စပ်ဒေသများတွင် စိုက်ထူထားသော လူကုန်ကူးမှု တိုက်ဖျက်ရေး ပိုစတာ

ရန်ကုန် ၊ ၂၉-၁-၂၀၁၅

ထိုင်း- မြန်မာ နယ်စပ်ဒေသ များတွင် မကြာခဏ ဖြစ်ပွားလျက် ရှိသော နယ်စပ်ဖြတ်ကျော် လူကုန်ကူးမှု များကို ထိရောက်စွာ အရေးယူပြီး ပြစ်ဒဏ်ချမှတ် နိုင်ရန်၊ လူကုန်ကူးမှု တားဆီး နှိမ်နင်းရေးတွင် ပါဝင ဆောင်ရွက် နေကြသော တရားရေး ဆိုင်ရာ အဖွဲ့အစည်း များ၏ စွမ်းဆောင်ရည် များကို မြှင့်တင်နိုင် စေရန် စသည့် ရည်ရွယ်ချက် များဖြင့် မြန်မာ- ထိုင်းနှစ်နိုင်ငံ လူကုန်ကူးမှု တားဆီး နှိမ်နင်းရေး အရာရှိများ၏ လူကုန်ကူးမှု ပြစ်မှု ဆိုင်ရာ တရားစီရင်မှု ပူးပေါင်း မြှင့်တင်ရေး အစည်းအဝေးကို ဇန်နဝါရီ ၂၉ ရက်နှင့် ၃ဝ ရက်တို့တွင် မန္တလေးမြို့၌ ကျင်းပရန် စီစဉ် ထားကြောင်း သိရသည်။ 

နှစ်နိုင်ငံအကြား လက်မှတ်ရေးထိုး ခဲ့သော လူကုန်ကူးမှု ပူးပေါင်း တိုက်ဖျက်ရေး ဆိုင်ရာ နားလည်မှု စာချွန်လွှာတွင် ပါရှိသည့် ပူးပေါင်း ဆောင်ရွက်ရေး လုပ်ငန်းစဉ်များကို အကောင်အထည် ဖော်ရန် ယင်း ဆွေးနွေးပွဲက များစွာ အထောက်အကူ ဖြစ်စေနိုင်ကြောင်း လူကုန်ကူးမှု တားဆီး နှိမ်နင်းရေး ရဲတပ်ဖွဲ့မှ တာဝန်ရှိသူ တစ်ဦးက ပြောသည်။

အဆိုပါ ဆွေးနွေးပွဲတွင် လူကုန်ကူးမှု တားဆီး နှိမ်နင်းရေးတွင် တစ်ခန်း တစ်ကဏ္ဍ မှ တာဝန်ယူ ဆောင်ရွက် နေသည့် တရားရေးဆိုင်ရာ အဖွဲ့အစည်း များ၏ စွမ်းဆောင်ရည် မြှင့်တင်နိုင်ရေး ကိစ္စရပ်များ အပြင် နှစ်နိုင်ငံအကြား သတင်း အချက်အလက် နှင့် အတွေ့အကြုံများ ဖလှယ်ခြင်း၊ ပူးပေါင်း ကြိုတင် ကာကွယ်ခြင်း၊ ပူးပေါင်းစုံစမ်း စစ်ဆေးခြင်း၊ လူကုန်ကူး ခံရသူများအား ကယ်တင်ခြင်း နှင့် ၄င်းတို့ကို စိတ်ဓာတ်ပိုင်း ဆိုင်ရာ ပြန်လည် မြှင့်တင်ပေးခြင်း စသည့် လုပ်ငန်းစဉ်များ ပိုမို ဆောင်ရွက် နိုင်စေရန် ဆွေးနွေးညှိနှိုင်း မှုများ လုပ်ဆောင် သွားမည် ဖြစ်သည်။

မြန်မာနိုင်ငံနှင့် ထိုင်းနိုင်ငံတို့ အကြား လူကုန်ကူးမှု ပူးပေါင်း တိုက်ဖျက်ရေး နားလည်မှု စာချွန်လွှာကို ၂ဝဝ၉ ခုနှစ် ကတည်းက နှစ်နိုင်ငံ သဘောတူ လက်မှတ်ရေးထိုး ခဲ့ခြင်းဖြစ်ပြီး အဆိုပါ စာချွန်လွှာ အရ ထိုင်း - မြန်မာ နယ်စပ်ဒေသ အချို့တွင် လူကုန်ကူးမှု တားဆီး နှိမ်နင်းရေး ပူးပေါင်း ဆောင်ရွက်ရန် နှစ်နိုင်ငံ ဆက်ဆံရေးရုံးများ ဖွင့်လှစ်ထားကာ ပူးပေါင်း ဆောင်ရွက်မှုများ လုပ်ဆောင်လျက် ရှိကြောင်း သိရသည်။

ဆောင်းဦး

#Themyawadydaily

#မြ၀တီနေ့စဉ်